نصائح طبيب مغربي

بحكم احتكاكنا اليومي بالمواطن اللي جاي للمستشفى باش يقضي شي غرض، إما زيارة مريض أو علاج أو استشارة أو إجراء تحاليل ولا فحوصات أو إكتشاف المكان ... كا نلقاو راسنا فمشاكل ممكن نتجنبوها بسبب بعض التصرفات اللي يمكن تفاديها بسهولة و تخلي كلشي يقضي الغرض علاش جاي و يربح وقتو و جهدو و صحتو ... لذلك و حرصا على السلامة النفسية و الجسدية و حفاظا على الوقت الثمين للجميع، لابد من اتباع بعض النصائح:
⛔1- جاي للسبيطار تشوف الطبيب، جيب معاك أي وثيقة أو ورقة أو راديو أو نتيجة فحص ولا تحليلة عندك، و رتبهم الله يرحم الوالدين بحسب التأريخ الزمني ديالهم، راه غادي تقدر تنقص عليك بزااااف ديال المصاريف و علينا بزاااف ديال الوقت!
⛔2- ايلا عندك شي دواء كا تشربو، عرف سميتو و العبار ديالو ... راه كاين 546 دواء صفر و 643 دواء زرق، منهم 243 مخطط بالحمر و 345 مخطط بالبيض، و كاين 64646 دواء فيهم حبة بيضة صغيرة و مدورة ... و الله ما يمكن نعرفو كل دواء من وصف لونو و لا شكلو ... و زايدون داك البورطابل اللي هاز راه فيه كاميرا تقدر تصور بيها الادوية كااااااملين و توريهم للطبيب المعالج ديالك ايلا عگزتي تحفظهم و لا تجيبهم!!
⛔3- حسبو شحال فعمركم الله يرحم الوالدين ... و الله ايلا بزاف علينا نحسبو لكل واحد دخل عندنا شحال فعمرو، المغربي هو الانسان الوحيد اللي تسولو "شحال فعمرك" يجاوبك "1964" 😑😑😑!!
⛔4- ايلا عندك موعد احتارمو، راه منين كا تجي تشوف الطبيب فتاريخ من غير الموعد اللي عندك فأنت كا تظلم الناس كاااااملة اللي جالسين و شادين موعد مدة هادي و وصلو و شدو النوبة باش يشوفو الطبيب ... و انت براسك ايلا جيتي فالموعد ديالك و دخل قدامك واحد بدون موعد و الله تا غادي يبقى فيك الحال و تحس بالشمتة و تقدر تنوض الصداع!!
⛔5- ايلا جاي للسبيطار تسول على طبيب ولا موظف و لا ممرض و لا تقني و عندك غير الاسم ديالو فقط، عرف أن لي قاليك السمية راه غير بغا يتفك منك!
واش عرفتي السبيطار شحال فيه من حميد و مصطفى وفوزية و نجاة و عبد العالي؟؟؟؟؟؟
راه اللي ما عطاك الاسم الكامل و المصلحة فين تلقاه و الهاتف ديالو ... و الله ايلا راه كركبك و بغاك تعيا و تمشي فحالك!!!!
⛔6- ايلا جاي للسبيطار (باستثناء الحالات المستعجلة) جيب معاك الوراق ديال التأمين الصحي و الضمان الاجتماعي باش تصاوبهم عند الطبيب ديالك مباشرة بعد نهاية الفحص، راه منين كا تمشي و ترجع من بعد شهر و نصف باش تطلب منو يعمر ليك الوراق ولا يكتب ليك تقرير، راك كا تعطلوا على خدمتو و تخليه يعطل مصالح الناس، و تطلب منو المستحيل اللي هو يتفكر حالة وسط الآلاف اللي شاف خلال هاد المدة!!!!!
⛔8- التوصيل ديال "الرميد" ماشي هو الرميد و ما عمرو غادي يمكنك من الاستفادة من المجانية الا في حالان نادرة جدا (الاورام و السرطان مثلا)، راه ايلا جبتي التوصيل و بغيتي تستافد راك بحال واحد جاب التوصيل باش دفع للفيزا و بغا يسافر بيه برا ... هاديك مجرد ورقة كا تثبت انك حطيتي ملف ديال الرميد و مازال ما عرفناش واش وافقوا عليه ولا لا !!
⛔9- منين كا يسولك الطبيب واش خدام، راه ماشي باغي يحصلك ولا يفرض عليك ضرائب هههه ... راه فكثير من الحالات نوعية العمل كا تكون عندها علاقة مباشرة مع المرض اللي عندك و تحديد العمل كا يساعدنا فتحديد التشخيص ديال الحالة!!!
راك فسبيطار، ماشي قدام لجنة ديال الإعانات ولا صحاب الاحصاء!
⛔10- "معاش غادي تسالي العملية؟؟" هاد السؤال خاص يولي داخل فالعقوبات الجنائية، ايلا كان ماتش ديال الكورة و للي قانون اللعبة محدد ليه 90 دقيقة يقدر يسالي ف 100 ولا 110 و لا يكمل فنهار آخر ايلا وقع شي حدث غير متوقع وسط منو، فما بالك بعملية جراحية اللي يمكن تتوقع فيها أي حاجة، و يمكن تحدث فيها اي مضاعفات و يمكن تاخد من الوقت ما يلزم الاطباء لانهائها في أفضل الأحوال و بأفضل النتائج الممكنة!!!
الافلام و المسلسلات و الله ما عندهم علاقة بالواقع!!!